La biblioteca da documentaziun da San Murezzan lascha per il mument gist digitalisar in film en colur ch'è vegnì surdà avant curt a la biblioteca. Il film era en possess da l’uniun da cura da San Murezzan. La manadra da la biblioteca da documentaziun, Dora Filli, di che quai è adina grev da giuditgar la valita istorica d’ina chaussa. Savens san ins pir en 50 onns tge valur che quel film ha propi.
Il film da passa 30 minutas mussa per part la glieud che mirava ils gieus olimpics, dentant era quasi tut las disciplinas olimpicas.
Dal 1928 e dal 1948 hai dà gieus olimpics en il Grischun, a San Murezzan. Dapi lura mai pli. La populaziun ha votà dal 2017 cunter ina candidatura per ils gieus 2026.
Sch’ins va oz tras San Murezzan chatt’ins pauca infrastructura da quel temp, naginas ruinas olimpicas. La schanza olimpica e vegnida stgarpada giu avant nov onns, il stadion olimpic è vegnì midà en in'abitaziun per il designer da mobiglia Rolf Sachs e la bobera olimpica vegn fatga onn per onn da nov cun naiv e glatsch.
