Siglir tar il cuntegn

Header

cuntegn

San Murezzan Cifras cotschnas – tuttina anc betg uras da spargnar

Il preventiv fa quint per il 2020 cun in minus da 842'000 francs en la cassa da la vischnanca. Da las investiziuns da stgars 37 milliuns francs è San Murezzan bun da finanziar be 7,2 milliuns francs cun agens meds. Tuttina han ils 172 votants preschents approvà tut ils puncts a l’emprima radunanza communala sut la batgetta dal president Christian Jott Jenny.

La radunanza communala ha ultra da quai prendì enconuschientscha da la planisaziun da finanzas per ils onns 2020-2024 da la vischnanca. Pliras vuschs criticas han rendì attent a la situaziun finanziala difficila, surtut en vista a las investiziuns planisadas ils proxims onns.

Nagin augment da taglia ...

Il pe da taglia resta dentant er l'onn proxim tar 60%. Quel per las immobiglias tar 0,5 promil. Quai ha la radunanza decis cun gronda maioritad. Sco ch'il president communal, Christian Jott Jenny ha menziunà, saja in augment dal pe da da taglia strusch pussibel ils proxims onns.

... dentant plirs lavatestas

Surtut il project d’ina nova scola a San Murezzan per radund 70 milliuns francs ha chaschunà discussiuns animadas en sala. Las propostas da stritgar ils raps da planisaziun per ina nova scola al lieu existent e da tschertgar in’autra parcella per il project, ha la radunanza finalmain refusà.

I dovra soluziuns

Las investiziuns che la vischnanca da San Murezzan ha previs per ils proxims onns sajan fitg autas, memia autas per finanziar ellas cun agens meds, uschia il president communal. Ch’ins saja vid examinar differentas mesiras. Ina da quellas fiss da spustar tscherts projects u perfin stritgar dal tut els. Sper in augment da taglia per 10% che signifitgass in plus da 4 milliuns francs en la cassa communala, vegniss er en dumonda da tschertgar sponsurs per singuls projects da la vischnanca.

video
Novitads
Or da Telesguard dals 11.12.2019.
laschar ir. Durada: 1 minuta 2 Secundas.

RTR novitads 06:00

Artitgels legids il pli savens