L'èra dals cuschiniers da renum mundial Mathis a San Murezzan va a fin: Il cuschinier Reto Mathis banduna l'ustaria a Salastrains. Malgrà clientella da jet-set saja il tschains-chasa per l'ustaria strusch da pajar per in interprendider sulet, hai num en ina communicaziun da Gault Millau. En l'avegnir vul Reto Mathis sa concentrar sin cussegliaziuns, pop-ups ed events.
Dapi l'onn 1967 han Reto e ses bab Hartly Mathis purtà la cuschina luxuriusa sin la muntogna en l'Engiadin'Ota. Sin la stagiun d'enviern 2022/23 duai l'ustaria si Salastrains puspè avrir. «Langosteria» surpiglia lura il scepter.
Moncler da nov a San Murezzan
A partir da la proxima stagiun d'enviern va il restaurant «CheCha» en mauns da Milaun: Lura avra la «Langosteria» – ina enconuschenta chadaina da mangiar da luxus cun restaurant da pesch – sias portas a Corviglia. Possessur da la chadaina da mangiar da luxus è Remo Ruffini, che posseda la marca da vestgadira Moncler.