Suenter che la discoteca «Diamond» ha stuì vegnir serrada datti cun ils dus novs clubs puspè dapli vita nocturna a San Murezzan. Latiers vegni era a dar in 'take away' en vischnanca che ha avert la notg fin las 04.00. In'offerta che fa tenor Hans Jürg Buff era da basegn. Suenter sortida na datti il mument nagina pussaivladad pli per mangiar insatge. Il take away vegn cun quai a remplazzar la pizzaria ch'era part da la discoteca Diamond, che ha stuì vegnir serrada l'enviern passà pervi d'ina dispita cun il locatur.
Ils clubs, «Sweet» e «Pampa» vegnan ad avair differents concepts. Tuts dus porschan musica live e differentas sairas da motto. Els remplazzan ina discoteca existenta, ed il cabaret a San Murezzan.