Ubain sin l'areal Grevas u sin il prà da polo duess vegnir realisada la nova chasa da scola per San Murezzan. Quai resulta da divers workshops cun ils experts e la cumissiun, scriva la vischnanca en ina communicaziun. La decisiun definitiva vegn l'emprim quartal da 2023.
En in proxim pass duessan vegnir realisads trais studis:
- In emprim davart la construcziun nova da la scola sin l'areal Grevas
- In segund davart la sanaziun e construcziun nova parziala da la scola sin l'areal Grevas
- In terz davart la construcziun nova da la scola sin il prà da polo a San Murezzan Bagn
La finamira è da surlaschar la decisiun davart il lieu lura a la populaziun. La primavaira che vegn è previs ina votaziun consultativa. Avant dus onns aveva il parlament da San Murezzan refusà da tratter la missiva davart il credit da planisaziun per la nova chasa da scola sin l'areal Grevas cun la pretaisa dad evaluar sco emprim il lieu per la nova scola e la grondezza da quella.