Cunter la surbajegiada cun hotel da luxus e clinica «Serletta sid» a San Murezzan datti danovamain opposiziun. Cunter la dumonda da bajegiar èn vegnidas inoltradas 21 objecziuns, sco la vischnanca ha confermà envers la «Posta Ladina». Tranter ils recurrents èn tranter auter ils dus hotels vischins Badrutt's Palace e Kulm che sa dostan gia dapi onns cunter il project. Sco proxim sto la patruna dal project, la «Chris Silber SA» prender posiziun, pir lura decida la vischnanca davart la lubientscha. Sco la patruna ha declerà envers la gasetta, na quintian ins però betg da vegnir perina senza ina dretgira.
Dapi 2015
L'entschatta fanadur aveva la Chris Silber SA inoltrà la dumonda da construcziun per l'hotel luxurius cun 128 chombras e set suitas – passa sis onns suenter ch'il suveran da San Murezzan aveva ditg Gea al plan d'utilisaziun. Il project correspundia al plan directiv Serletta ch'il Tribunal federal ha approvà 2021, ha ditg da lez temp l'interpresa. I vegnia ad esser ina contribuziun impurtanta per sviluppar vinavant la regiun turistica Engiadina-San Murezzan. Sper l'hotel duai era dar in bajetg da clinica.
