La vischnanca da San Murezzan ha cumprà quest atun l’edifizi da l’anteriur hotel Primula a Champfèr. Avant ch’i vegn realisà là unitads d’abitar per indigens, vegn la chasa duvrada per fugitivs da l’Ucraina.
Soluziun interimistica
Fin ch’il project d’abitaziuns vegnia realisà, possian fugitivs trair a niz las localitads. Il october saja l’edifizi vegnì endrizzà per quai, scriva la vischnanca da San Murezzan en ina communicaziun. Actualmain abiteschian 16 fugitivas e fugitivs da l’Ucraina a Champfèr. Els avevan da bandunar lur alloschi actual a San Murezzan en vista a la stagiun d’enviern. Per il manaschi da l’alloschi e sco persuna da contact per ils fugitivs, è Graziella Ramponi responsabla.