Dapi ils 4 da december 2020 era il casino San Murezzan serrà. D’ina vart pervia da las restricziuns da corona, da l’autra vart haja il casino durant il matg adina serrà, uschè la directura dal casino San Murezzan, Carmen Haselwanter. Questa fin d'emna avra el però puspè sias portas.
Nov dachasa
Durant il temp da serrada ha il casino fatg midada. Da San Murezzan Bogn en la vischnanca, amez la zona da peduns. Tenor Carmen Haselwanter saja quai in grond pass en la gista direcziun. Numnadamain s'haja badà durant ils ultims 18 onns a San Murezzan Bogn ch’il lieu è memia pauc central. Al nov lieu amez la vischnanca possian ins spetgar dapli giasts.
Restricziuns pervia da corona
La situaziun da corona fa main plaschair a la directura. Numnadamain possian actualmain visitar be 30 giasts il casino al medem mument. La surfatscha da 500 meters quadrat sur trais plauns è la mesadad da quella al vegl lieu.
Tuttina spera Carmen Haselwanter ch’ins possia bainbaud puspè emplenir il casino e ch’igls giasts giaudan l’aventura.
