Sco «Figaro da San Murezzan» ha Jürg Oschwald taglià ils chavels dals ritg e bels. Atras quai èn sa furmadas amicizias cun quella clientella ed uschia è el adina puspè vegnì envidà a parties da la high society. Pli e pli è el sez daventà ina part da quella scena ed ha vivì ina vita da jetsete parties cun ina gronda abitaziun a San Murezzan ed ina garascha cun 15 autos. El ha lavurà bler – mintgatant radund 16 uras al di – e la saira è el ì dad ina party a la proxima.
Da San Murezzan sin la mar
Ma cun il temp ha el realisà ch'el na vul betg pli viver vinavant quella vita. Ed uschia ha'l vendì sia fatschenta da coiffeur «Figaro», ha cumprà ina pitschna bartga ed è per set mais viagià sin ed enturn la Mar Mediterrana – e quai tut sulet e mo cun ses chaun «Grisch».
Turnà è Jürg Oschwald da quel viadi betg mo cun il segund chaun «Whiskey», ma era cun novas valurs. Durant quels set mais haja el numnadamain realisà: Ils 8 meters quadrat sin sia bartga sajan stads avunda, nagut n'haja mancà ad el.
Ina nova vita
Perquai aveva'l er tschiffà in schoc cura ch'el ha vis tut ses 15 autos en la garascha – u sco ch'el di «Luxusschrott». El ha vendì betg mo ses autos da luxus mabain er bler auter. Oz viva el sin pli paucs meters quadrat e passenta tranter auter bler temp en sia chamona a Valzeina ch'è lunsch davent da tut il travasch.
Dapi plirs onns va el era en il Stadtpark a Cuira, nua ch'el brassa regularmain liongias per la glieud che n'ha betg gì tant cletg sco el en lur vita. Jürg Oschwald discurra cun la glieud e taidla tiers a lur problems. Quai saja per el ina bella chaussa cun la quala el possia gidar a moda fitg directa.
Dal tuttafatg cumià n'ha el dentant betg prendì da la vita en il «schampagner-clima» – sco ch'el numna la vita en il ravugl dals ritg e bels a San Murezzan. Er sch'el n'haja betg pli la medema vista e guarda pli criticamain sin quest mund magari superfizial, giaudia el da turnar qua e là per en pèr uras sin visita en sia vita da pli baud. Quai ch'el giaudia dentant anc pli fitg saja da suenter puspè turnar en sia nova vita pli simpla e calma.
