Siglir tar il cuntegn

Header

audio
Suenter in retard da dus onns ha il Sun Ice Festival lieu
Or da Actualitad dals 25.03.2022.
laschar ir. Durada: 3 minutas 18 Secundas.
cuntegn

San Murezzan Il Sun Ice Festival ha finalmain premiera

Pervia da la pandemia ha la premiera dal festival da musica electronica lieu cun dus onns retard.

Cun in preventiv da 1,6 milliuns francs ed 11'000 visitaders e visitadras spetgadas è il Sun Ice Festival in grond festival. In dals emprims ch'ha insumma lieu suenter la pandemia. Ed in che vegn organisà dad in comité giuven. Ils dus fundaturs Loris Moser e Quirin Hasler han 24 e 22 onns, la media da vegliadetgna dal comité è tar 25 onns.

Avant dus onns n'essan nus betg vegnids prendids serius. Entant survegnin nus bler sustegn da differentas varts.
Autur: Loris Moser Fundatur dal Sun Ice Festival

Ch'els sajan restads londervi ed hajan mess en pe il festival da musica electronica a Salastrains sur San Murezzan haja chaschunà respect. Tuttina hajan els sutvalità las dimensiuns da lavur avant dus onns, sutvalità vi da tge ch'ins stoppia tut pensar. 24 persunas lavuran actualmain vi da l'organisaziun dal festival, non-stop, sco Loris Moser di envers RTR.

Persvadì per uss e per l'avegnir

L'idea per il festival è naschida l'onn 2018 e vess gì premiera il 2020. Cun dus onns retard pervia da la pandemia po il festival uss avair lieu l'emprima fin d'emna d'avrigl. Cler è gia uss ch'i vegn a dar ina successiun l'onn proxim, cun dubel uschè blers bigliets. En trais onns duai il festival tenor Loris Moser avair lieu durant trais fins d'emna cun mintgamai 40'000 visitadras e visitaders.

RTR actualitad 11:00

Artitgels legids il pli savens