Questa fin d’emna èn las cursas da la cuppa mundiala da skis a San Murezzan. Avant che las cursas cumenzan uffizialmain stat in giuven Engiadinais en il focus. Silvano Gini, skiunz da 23 onns, è in dals precursurs e va avant il numer in giu da la pista.
Igl è grev da chattar pistas da trenament per la cursa rapida ed il super-g. Perquai è quest per mai in super training.
L'Engiadinais da 23 onns è quasi creschì si sin la Corviglia. Ma er sch'el enconuscha la pista – è quai mintga giada insatge nov. El stoppia avair in «game-plan» cura ch'el va a la partenza. Quai dettia ad el segirtad. Gini ha er contact cun las profiskiunzas che treneschan al lieu. Savens vegnian las skiunzas er per tips tar el.
Bun’experientscha
Il skiunz che absolva cursas da la cuppa d'Europa profitescha da l’experientscha sco precursur da las cursas da la cuppa mundiala. El vesa questa lezia sco bun trenament per sias cursas. Numnadamain saja difficil da chattar pistas per trenaments da cursas rapidas e super-g. Er sch’i na vala betg sco cursa, saja quai ina schanza unica da sa congualar cun las meglras skiunzas dal mund.