La nova constituziun communala mantegna mo pli l'urden fundamental da la vischnanca. Disposiziuns e detagls vegnan reglads cun leschas. Cun quai daventa la constituziun da San Murezzan pli simpla, e midaments pon ins far pli levamain.
En la nova constituziun vegnan la suprastanza ed il cussegl communal rinforzà en lur lezias e cumpetenzas. La radunanza communala perencunter ha en avegnir mo pli la cumpetenza per decider davart il pè e la tariffa da taglia e per deliberar il preventiv.
Sur dal dretg da vuschar per esters duai definitivamain vegnir decidì en ina votaziun separada. Quai ha il cussegl communal decidì en sia seduta dals 27 d'avust suenter lunga discussiun – e cun quai confermà la decisiun da l'emprima lectura dal messadi ils 11 da zercladur.
Ulteriuras decisiuns
Il cussegl communal da San Murezzan ha en pli deliberà la nova cunvegna da prestaziun cun la scola da musica da l'Engiadin'Ota. Ed el è sa decidì unanimamain da betg pli far protocols detagliads en scrit da las sedutas – mabain da porscher en avegnir protocols dad audio, ed en scrit mo pli protocols cun las decisiuns.
