Survegnir il dretg da vuschar duain esters cun permissiun da domicil C. Quai vul dir persunas da pajais da l'UE/EFTA che stattan dapi almain 5 onns en Svizra u persunas da terzs stadis che stattan dapi almain 10 onns en Svizra.
Impurtanza per San Murezzan
A San Murezzan vivian e lavurian bleras persunas da l'exteriur. E bleras dad ellas fetschian era part activamain da la vita communala e s'identifitgeschian cun la vischnanca, hai num en la missiva per la votaziun. Perquai saja quai be gist che quellas persunas survegnian la pussaivladad da sa participar a las decisiuns politicas.
La vischnanca è en pli da l'avis ch'i saja temp per la populaziun da San Murezzan da s'exprimer en chaussa. Surtut perquai ch'in quart da las vischnancas grischunas haja inoltrà il dretg da vuschar per esters.
Votaziun separada
Oriundamain fascheva il dretg da vuschar part da la revisiun da la constituziun communala ch'il suveran ha acceptà il november 2020. Cunquai che quel era vegnì crititgà ferm en la consultaziun aveva il cussegl communal decidì da suttametter quel al suveran en ina votaziun separada. En sia sesida dals 28 da schaner ha il cussegl deliberà la missiva cun 9 cunter 8 vuschs per mauns da la votaziun a l'urna.
Autras vischnancas enconuschan gia quest dretg
La carta sutvart mussa en tgeninas vischnancas grischunas che esters ed estras han gia il dretg da vuschar tar decisiuns communalas, marcà blau. Cotschen correspunda a nagin dretg da votar commuanal.