Siglir tar il cuntegn
Inhalt

Engiadina San Murezzan: Minus 50'000 francs per il president communal

Il cussegl communal da San Murezzan vul sbassar la paja dal president communal per 50'000 francs. Quai ha el decidì tar l'emprima lectura dal preventiv communal 2019.

La sesida dal cussegl communal da San Murezzan
Legenda: Cussegl communal San Murezzan La sesida dal cussegl communal da San Murezzan Reto Mayer

Cura che Christian Jott Jenny surpiglia l'entschatta da l'onn proxim l'uffizi dal president communal da San Murezzan, pudess el gudagnar considerablamain pli pauc che ses antecessur Sigi Asprion. Il cussegl communal ha numnadamain acceptà cun 11:1 vuschs la proposta da la fracziun da la PCD da scursanir la paja dal president communal per 50’000 francs – pia dad actualmain 230’000 francs sin 180’000 francs l'onn.

Paja è gia daditg in tema

La paja dal president communal saja gia daditg in tema da discussiun, ha ditg la co-presidenta da la PCD San Murezzan, Karin Metzger Biffi. E che Christian Jott Jenny ha punctuà durant ses cumbat electoral pliras giadas ch'el lavurass era per pli pauc, saja natiralmain stà per els sco da dar il pass davant il gol vid – e perquai uss er questa proposta.

Christian Jott Jenny n'ha betg vulì prender posiziun. El commenteschia questa decisiun pir suenter esser en uffizi, pia davent dal schaner 2019.

Dapli paja per suprastants

Ils 50’000 francs ch'il cussegl communal da San Murezzan vul scursanir da la paja dal president communal, na vul el dentant betg spargnar cun il nov preventiv. El ha numnadamain er acceptà la proposta da la PCD dad auzar las pajas dals quatter commembers da la suprastanza communala – quei da totalmain 160'000 francs sin 210’000 francs.

Sut tetg n’è il preventiv communal anc betg. La segunda lectura è en trais emnas, ils 15 da november. L'ultim pled en chapitel ha la radunanza communala ils 11 da december. La cumpetenza da definir concret la paja dal president communal ha a San Murezzan dentant la suprastanza communala.

In preventiv equilibrà

Il preventiv 2019 prevesa tar expensas da radund 76,3 milliuns francs in pitschen gudogn da 235’000 francs. Las investiziuns muntan a bundant 35,6 milliuns francs.

Ils midaments en stads er tar quel budget pitschens:

  • Per la plazza da la posta a Champfèr è vegnì approvà in credit da planisaziun da 60’000 francs.
  • Per la halla da glatsch regiunala che va en votaziun il favrer 2019 duai vegnir budgetà in import. Quant aut che quel vegn ad esser, vegn a definir la suprastanza communala per la segunda lectura.

RR novitads 06:00