L’areal Signal a San Murezzan na stat betg a disposiziun per ina halla da glatsch regiunala. Quai ha il cussegl communal da San Murezzan decidì cun 9 encunter 8 vuschs.
In’evaluaziun dad experts externs era vegnida a la conclusiun – ch’il pais finanzial ed ils ristgs per la vischnanca fissan pli gronds, che las schanzas ch’ina halla da glatsch regiunala purschess a San Murezzan. Perquai aveva la suprastanza proponì al cussegl, da betg metter a disposiziun l’areal a la Regiun Malögia.
Cun questa decisiun è il project enavos sin champ 1. La balla turna tar la Regiun Malögia che stu puspè cumenzar cun la tschertga d'in areal per fabritgar ina halla da glatsch regiunala.
Las ulteriuras decisiuns
Il cussegl communal ha decidì da declerar per urgenta ina incumbensa davart in eventual scumond per fieus artificials. La suprastanza vegn uss ad elavurar ina proposta en chaussa.
Ils livestreams da las sesidas vegnan era l'onn proxim a cuntinuar, dentant en ina furma pli simpla e pli bunmartgada. Il cussegl ha decidì da lavurar en avegnir cun ina camera fixa che po sa mover, e che ha ina funcziun da zoom. Ils custs èn tar 13'000 francs, la varianta actuala custa radund 50'000 francs.
La fin ha il cussegl communal anc elegì sia nova presidenta e sia nova vicepresidenta. L'onn 2022 ha la presidenta num Claudia Aerni (Next Generation), la vicepresidenta è Prisca Anand (PLD).