Siglir tar il cuntegn

Header

Tiziano Zeller è il nov directur da la Snowsports San Murezzan SA.
Legenda: Tiziano Zeller è il nov directur da la Snowsports San Murezzan SA. MAD
cuntegn

San Murezzan Nov directur per la scola da skis

Suenter tschintg onns sa separan las vias dal directur Bruno Marinoni e la Snowsports San Murezzan SA. Quai pervi da differents avis davart la direcziun da la scola da skis San Murezzan, ha ditg Beno Suter, il president dal cussegl administrativ envers RTR.

Sin basa dal midament al timun da l’interpresa hajan er ulteriuras collavuraturas e collavuraturs, ch'hajan gì ina stretga collavuraziun cun Bruno Marinoni, decis da bandunar la scola da skis.

Pervi dal midament al timun han decis pliras collavuraturas e collavuraturs da bandunar la scola da skis
Autur: Beno SuterPresident dal cussegl administrativ da la Snowsports San Murezzan SA

Quest pass deploreschia il cussegl administrativ. Mintga midament possia però er esser ina schanza. Els sajan persvads ch'ins possia chattar novas collavuraturas e collavuraturs, uschia Suter vinavant.

Tiziano Zeller è il nov directur

Sco nov directur è vegnì elegì l’indigen Tiziano Zeller. El lavura gia divers onns sco magister da skis tar l’interpresa ed è dapi trais onns part dal cussegl administrativ. La primavaira 2020 ha el absolvà la scola spezialisada superiura da turissem. Dapi lura lavura el sco manager d’events tar Schlarigna Turissem. Sia nova sfida cumenza l'avust da quest onn.

Nova participaziun finanziala

Ultra da quai duai en avegnir vegnir schlargiada la collavuraziun cun la Skiservice Corvatsch SA. Ella è dapi divers onns in partenari da la scola da skis San Murezzan e duai sa participar en avegnir er finanzialmain vid la Snowsports San Murezzan SA.

RTR Novitads 12:00

Artitgels legids il pli savens

Scrollar a sanestra Scrollar a dretga