Siglir tar il cuntegn

Header

San Murezzan.
Legenda: Glisch verda per la realisaziun d'in hotel da sanadad e la nova clinica Gut sin l'areal Serletta Sid. RTR, Dario Müller
cuntegn

San Murezzan Nova speranza per project «Serletta Sid»

Avant quatter onns aveva il suveran da San Murezzan approvà il plan d'utilisaziun per l'areal Serletta Sid. Cunter quella decisiun avevan ils possessurs da las immobiglias cunfinantas fatg recurs tar la Dretgira administrativa dal Grischun. Quella ha curt avant Nadal prendì posiziun a favur dal project cun in hotel da sanadad e la nova clinica Gut. Quai communitgescha la vischnanca da San Murezzan.

Il medem mument ha la Dretgira administrativa refusà il recurs dal promotur dal project. Quel recurs sa drizzava cunter la cundiziun dal plan d'utilisaziun, ch'il volumen da construcziun da l'hotel stoppia vegnir utilisà per gronda part per intents dad hotel. Quai munta che las pussaivladads da duvrar l'hotel restan restrenschidas.

Per Clinica Gut fai prescha

Ins saja cuntent cun la resposta da Cuira, ha ditg il pledader da la Chris Silber SA, Christian Gartmann. Dentant na signifitgia la sentenzia anc betg via libra per il project. Las partidas adversarias dal project Serletta Sid pon numnadamain anc trair vinavant il recurs al Tribunal federal.

Perquai vegnia entant planisà parallel en differents lieus, tranter auter a Silvaplauna ed a San Murezzan Bogn e quai senza la cumbinaziun cun in hotel da sanadad. Ils contracts da fittanza da la Clinica Gut al lieu existent a San Murezzan, scadan il 2023. En il decurs da quest onn haja la clinica perquai da decider, nua ch'ella veglia planisar e realisar sia nova dimora, ha declerà Gartmann.

RTR novitads 12:00

Artitgels legids il pli savens

Ir a sanester Ir a dretg