Suenter 8 ediziuns dal City Race cun cursas da skis, concerts live sin plaz (Gotthard 2015), gastronomia e shows da moda ha il cussegl communal da San Murezzan refusà da sustegnair vinavant l’eveniment cun 250’000 francs l’onn. Quai malgrà che la suprastanza da San Murezzan e la cumissiun da turissem avevan recumandà da sustegnair l’eveniment. La societad City Race ha perquai decis da desister sin in’ulteriura ediziun da l’eveniment tradiziunal mintgamai al cumenzament da december.
Alternativas betg realisticas
Il parlament da San Murezzan n’è era betg persvas dal lieu da l’eveniment entamez la vischnanca da San Murezzan ed ha giavischà da surlavurar il concept dal City Race. Lieus alternativs per realisar l’eveniment en in auter lieu, hajan ins examinà, ha declerà Patrik Wiederkehr ad RTR, el è commember da la societad City Race e manader da la scola da skis Suvretta Sports. Per attrair la glieud en vischnanca e lantschar la stagiun d’enviern na vegnia dentant betg en dumonda per la societad da realisar in tal eveniment sin la muntogna u en la periferia da San Murezzan.
Surlavurà concept invan
Sin giavisch da las instanzas politicas hajan ins surlavurà pliras giadas il concept dal City Race, tuttina n’hajan las novas versiuns betg pudiì persvader ils politichers, ha suttastritgà Wiederkehr.
Discussiun controversa
Sco che la societad scriva en sia communicaziun, accepta ella la decisiun politica ed ha chapientscha ch’ins na vul betg dar or ils raps communals cun la pala. Tuttina duessi dar in’alternativa al City Race per che San Murezzan possia lantschar la stagiun d’enviern 2017/17 era cun in eveniment. Surtut en vista a las mastranzas mundialas da skis che han lieu proxim onn en Engiadin’Ota.