Siglir tar il cuntegn
cuntegn

Engiadina San Murezzan: proxima staziun suprastanza communala

Da 8 candidats sa retira in candidat pervi da l’elecziun dal president communal – il rest candidescha per ils quatter posts en l'executiva da San Murezzan.

L'entrada da la chasa communala da San Murezzan
Legenda: La chasa communala da San Murezzan RTR, Georg Luzzi

Maurizio Pirola retira sia candidatura. El aveva communitgà gia la fin d’avust ch’el desistia d'ina candidatura per in'ulteriura perioda d'uffizi, sche Christian Jenny avess da daventar president communal.

Anita Urfer percunter ha communitgà il cuntrari. Ella vuleva terminar cun la politica ord motivs famigliars. Christian Jenny haja contactà ella e giavischà, ch'ella candideschia anc ina giada per forsa sa participar al nov team. Anita Urfer ha experientscha en la politica, e quest’experientscha vuless il nov president sche pussaivel nizzegiar.

Dals ulteriurs trais candidats che RTR ha contactà na dependa la candidatura betg dal president communal. Els vulan s'engaschar per il vitg San Murezzan, e quai independent sche Christian Jenny u Sigi Asprion è a la testa.

Dumengia ils 14 d'october han lieu las elecziuns per ils quatter posts sco suprastants communals da San Murezzan. Set sa mettan a disposiziun, da quels èn actualmain trais en uffizi. Quatter persunas candideschan per l'emprima giada per quel uffizi.

RR actualitad 12:00