Il rendaquint da la vischnanca da San Murezzan serra cun in gudogn da var 104'000 francs. Quai tranter auter grazia a 23 milliuns francs dapli entradas da taxas che budgetà. Surtut tar las taxas da midada da possess e sin il gudogn tras la vendita da bains immobigliars eran las entradas pli autas.
Tant persunas natiralas sco era las persunas giuridicas han pajà dapli taxas che budgetà. Da l'autra vart eran las expensas da persunal e da rauba pli bassas e la vischnanca ha pudì scriver giu posiziuns cun in import da 31,5 milliuns francs. Finalmain hajan ils effects da la pandemia chaschunà per custs pli bass. Il cussegl communal ha deliberà il rendaquint per mauns dal referendum facultativ.
La suprastanza en cumbat da votaziun per la halla da chavaltgar
Il cussegl communal è en pli vegnì infurmà davart emprimas retschertgas da la cumissiun da gestiun en connex cun il cumbat da votaziun per la sanaziun da la halla da chavaltgar da la suprastanza communala. En il center stà la sairada d'infurmaziun dals 8 november 2022. Gia curt suenter era vegnida crititgada la tenuta da la suprastanza communala. Igl è vegnì discurrì dad ina occurrenza da reclama per la sanaziun. En pli è pir suenter ch'il cussegl communal ha tractà e refusà la sanaziun vegnì fatg e preschentà in rapport d'experts, ch'aveva mussà si cifras da valurisaziun bler pli positivas. Il cusseglier communal Curdin Schmidt aveva in sin quai pretais che la cumissiun da gestiun vegnia activa.
Quella haja fatg entant emprimas retschertgas e vegnia a la conclusiun provisorica che la suprastanza communala n'haja betg cuntrafatg al dretg. Ella saja dentant sa muventada en ina zona grischa. In'autoritad communala haja dad infurmar en moda objectiva e transparenta. E quai n'haja la suprastanza betg fat durant la sairada d'infurmaziun dals 8 da matg 2022. Il cussegl communal ha prendì per enconuschientscha il rapport.
Scrit giu dus incumbensas
Per finir ha il cussegl scrit giu duas incumbensas dal anteriur cusseglier Fritz Nyffenegger. Il cussegl ha cun quai decidì da betg limitar la vendita dad immobiglias a persunas da l'exteriur ed era da betg elavurar ina ordinaziun da transparenza en connex cun la finanziaziun da cumbats da votaziun.