Siglir tar il cuntegn

Header

cuntegn

San Murezzan Scola da skis sa prepara sin l’enviern cun corona

La pli gronda scola da skis svizra è la scola da skis San Murezzan. Durant la stagiun d’enviern dumbra ella passa 400 collavuraturas e collavuraturs. Da planisar tut questas persunas è mintg’onn ina gronda sfida. Ina planisaziun cun coronavirus fa tut anc pli difficil.

Quest enviern saja da far quint cun damain giasts internaziunals, di Bruno Marinoni, il manader da la scola da skis San Murezzan. Quai haja per consequenza ch’ins impiegheschia er dapli magistras e magisters da skis svizzers.

Mancar na dastga questa stagiun d’enviern natiralmain er betg in concept da segirezza. Quel prevesa tranter auter in obligatori da mascras e da mesirar regularmain la temperatura tar las magistras ed ils magisters da skis.

audio
La pli gronda scola da skis en Svizra sa prepara sin enviern cun corona
ord Actualitad dals 20.10.2020.
laschar ir. Durada: 2 minutas 28 Secundas.

Scolaziun via e-learning

Midadas datti er tar la scolaziun dals passa 400 emploiads da la scola da skis da San Murezzan. Empè da far la scolaziun teoretica en ina sala cun var 150 persunas, vegn quella quest onn fatga online.

Malgrà tut las midadas e restricziuns è Bruno Marinoni persvadì ch’i dat ina stagiun cun blers giasts. Impurtant saja d’esser flexibel e da pudair reagir a curta vista sin differentas situaziuns.

RTR actualitad 6:00

Artitgels legids il pli savens