Siglir tar il cuntegn

Header

cuntegn

Engiadina San Murezzan, Silvaplauna e Segl restan tar lur project «Du Lac»

Surprais sajan els stads il schaner, han ils presidents communals da Segl e Silvaplauna e la vice-presidenta San Murezzan ditg envers las medias, cura che las autras vischnancas hajan puspè mess sin maisa l'idea d'ina chasa da tgira per l'entira regiun.

La decisiun da lavurar vi da duas chasa da tgira decentralas saja crudada gia il 2015, il 2017 haja il suveran confermà questa strategia. Da reveder questa decisiun na vegn perquai betg en dumonda per las suprastanzas da Segl, Silvaplauna e San Murezzan. Ellas vulan cuntinuar cun lur project «Du Lac» a San Murezzan Bagn.

audio
Mezdi: Chasa da tgira Engiadin'Ota – Conferma per duas chasas
ord Actualitad dals 21.03.2019.
laschar ir. Durada: 3 minutas 1 Secunda.

Motiv principal: custs

Durant la planisaziun hajan las vischnancas da Puntraschigna fin S-chanf constatà ch'i fiss pussaivel da construir a Samedan ina chasa da tgira cun 117 letgs. Ina chasa damai che purschess avunda plazza per l'entira regiun. E surtut che la construcziun e la gestiun fissan pli bunmartgadas en congual cun duas chasas da tgira.

Ils custs mettan las trais vischnancas da San Murezzan fin Segl dentant en dumonda, qua sa tracti mo da stimas, scrivan ellas en lur resposta. En pli vegnia la gestiun surdada a la Fundaziun Provediment da la sanadad Engiadin'Ota, ins possia damai profitar da sinergias.

Las vischnancas da Puntraschigna engiu vegnan ad infurmar ils 2 d'avrigl davart lur project a Samedan. Enfin lura na vegnan ellas betg a prender posiziun.

Project Du Lac

Il project per la chasa da tgira «Du Lac» a San Murezzan Bagn prevesa sin quatter auzadas 60 letgs da tgira e 17 abitaziuns per seniors. Integrada duai esser ina staziun da demenza. Ina garascha sutterrana publica duai cumpensar ils parcadis ch'existan actualmain sin l'areal.

Lunga istorgia

Il 2014 aveva la populaziun da l'Engiadin'Ota refusà il project Farkas. Quel aveva previs ina chasa da tgira centrala cun 144 letgs davos l'ospital a Samedan. Suenter n'eran las vischnancas betg perina co enavant.

Sin quai han Segl, Silvaplauna, San Murezzan e Puntraschigna decidì da vulair realisar in'atgna chasa da tgira a San Murezzan. Pli tard è Puntraschigna sa decidì da tuttina sa participar al project per ina renovaziun e construcziun nova da la chasa da tgira Promulins a Samedan.

Il 2017 ha il suveran da la regiun lura confermà la strategia da vulair realisar duas chasas da tgira en Engiadin'Ota, ina a Samedan ed ina a San Murezzan.

RR novitads 06:00

Artitgels legids il pli savens