Els fan controllas d'autos e da velos, controllas en connex cun la lescha da pestga u controllas da bulieus. Surtut en lieus che n'èn betg bain u insumma betg cuntanschibels cun autos.
Avant 17 onns è questa patruglia vegnida fundada sco emprima en Svizra. Entant datti policists sin velos en diversas citads ed er a la plazza aviatica a Turitg.
Policists ambassadurs
Per San Murezzan n'èn ils policists betg mo policists, mabain era ambassadurs per ils turists. Sin il velo sajan els pli manaivel ad auters velocipedists u era a viandants. Inscunters sajan uschia savens simpatics e la glieud resguardia els cun bainvulientscha.
La glieud vul far vacanzas qua e betg magliar la pulvra da l'auto da polizia.
Quasi mintga di è in policist da la polizia communala da San Murezzan sin patruglia cun il velo.
Dapi dus onns fan ils policists lur patruglias cun velos electrics, sco adina dapli auters velocipedists. In svilup che chaschuna nov potenzial da conflict e ch'ils policists observan perquai precis.
Sco emprima mesira pendan dapi questa stad tavlas en divers lieus a San Murezzan. Quellas fan attent che viandants e bikers duain mussar respect in envers l'auter.
RR actualitad 06:00