La Casino San Murezzan SA vul restructurar las localitads d’ina butia amez la vischnanca da San Murezzan. Quai demussan ils plans da construcziun ch’èn publitgads en chasa communala.
Ord butia daventa Casino
Tenor ils plans sa tracti da la butia da ferramenta en la Via Veglia che sa chatta sper la chasa communala da San Murezzan. Nua ch'ins po oz cumprar en duain ins en avegnir pia pudair giugar gieus da fortuna.
Contract actual scada
Motiv che la firma è a la tschertga d’in nov lieu pudess esser tranter auter, ch’il contract actual per las localitads dal Casino en l’hotel Kempinski a San Murezzan Bagn scada il 2022.
Dapli davart ils plans concrets e sche il casino survegn propi in nov dachasa u sch’i sa tracta d’in ulteriur post n’ha la directura dal casino San Murezzan anc betg vulì tradir. Tenor ella vul ins spetgar cun publitgar ulteriurs detagls fin ils 22 da zercladur, cura ch’il temp da recurs è scadì. Er il possessur da la butia pertutgada n'ha betg vulì prender posiziun areguard in midament pussaivel.
