Mintg’onn durant las festas crescha San Murezzan dad in vitg en ina pitschna cità. Las pistas, il glatsch e perfin la via da spassegiar enturn il lai è bain frequentada. Nagut cun pasch e calma. Quai sa bada era en il vitg sur il lai.
Hotels, restaurants e butias bain visitadas
Cun ils prims radis da sulai en las giassas da San Murezzan, rivan las massas da glieud our da lur alloschi. Davant ed en las butias è in travasch. Quai dovra gnerva dals indigens e da las indigenas.
Uss sa dovra pazienza. Ils giasts na paran betg dad avair, perquai vaina nus indigens dad avair ella.
Ma na betg be en vischnanca ed en las giassas ha quai per il mument chaos.
Ir or da via al traffic
Sche ins piglia l’auto per ir a San Murezzan, as duai far quint cun in temp da spetga sin l’axa principala da San Murezzan.
Quai è normal durant las duas emnas sur las Festas. L’infarct dal traffic sa bada il pli ferm vers il suentermezdi. Er en il vitg. Uschia è meglier da laschar a chasa l’auto ed ir a pè.
Da quest temp sun jau en gir cun mes uffant, e quai per la gronda part a pè. Uschia na vegn jau betg grit sin via.
Tuttina è per ils indigens e las indigenas cler, che ils giasts portan la lavur e blers raps en vischnanca. Perquai s’accepta il travasch e ins guarda scha pussaivel da guntgir la lavina da tola ed las undas da giasts. Saja quai cun desister sin l’auto u da mussar pazienza en las butias.
La fulla a San Murezzan
-
Bild 1 von 5. Blera glieud è en viadi vers il lai. Bildquelle: RTR.
-
Bild 2 von 5. Travasch sin il lai, schebain che il glatsch e amo stigl e privlus da passar. Bildquelle: RTR.
-
Bild 3 von 5. Egls mirveglius davant las vitrinas. Bildquelle: RTR.
-
Bild 4 von 5. Er en il vitg han ils automobilists da spetgar che i va enavant. Bildquelle: RTR.
-
Bild 5 von 5. La colonna dad autos riva puspè fin a Schlarigna. Bildquelle: RTR.