Siglir tar il cuntegn

Header

cuntegn

San Murezzan Tribunal federal conferma il plan da furmaziun «Serletta»

Ils recurs cunter il plan da furmaziun Serletta a San Murezzan han fatg naufragi. Il Tribunal federal ha decis en favur dal plan da furmaziun.

Sis recurrents han battì fin a Losanna cunter il plan da furmaziun. Tar quests recurrents tutgan tranter auter hotels pli prominents da San Murezzan, sco il Badrutt’s Palace ed il hotel Kulm. Ils recurrents han crititgà ch’il plan da furmaziun lubeschia bajetgs memia auts. Plinavant chaschunass la clinica canera cun traffic da helicopters ed il bajetg da posta vegnia stgarpà giu. Quai be intgins dals arguments.

Ils derschaders dal Tribunal federal na sustegnan dentant betg quell’argumentaziun. La vischnanca da San Murezzan haja sclerì ils detagls e fatg las expertisas necessarias. Quai scrivan ils derschaders en ina sentenzia ch’è vegnida publitgada la gievgia. Igl existia in «eminent interess public» per la vischnanca da rinforzar la posiziun da San Murezzan sco destinaziun turistica, uschia l’argumentaziun dal Tribunal federal. Il plan da furmaziun lubeschia novs hotels en in quartier nua ch’i dat gia plirs hotels.

Plan per in hotel datti vinavant

Per propi pudair construir definitivamain in hotel u ina clinica dovri dentant anc ina permissiun da construcziun. La possessura da la parcella «Serletta», la Chris Silber SA, restia tar ses plan da realisar in hotel da sanadad a San Murezzan. Uschia vegn cità il possessur da la societad, Martin Meyer. Els veglian realisar l'hotel dentant pir suenter che la Clinica Gut ha realisà sia nova dimora.

La Clinica Gut ha entant chattà in auter lieu. Il nov bajetg duai vegnir realisà sco annexa dal Center dal bogn termal «Heilbadzentrum». Ina dumonda da construcziun è schon vegnida inoltrada.

audio
Per tadlar: curt e cumpact
01:35 min, RTR Audio dals 29.07.2021.
laschar ir. Durada: 01:35 minutas.

RTR novitads 12:00

Artitgels legids il pli savens

Scrollar a sanestra Scrollar a dretga