Entant che Nadal e Bumaun èn passads tar nus, stattan quels dis da festa en auters pajais pir avant porta. Ils 7 da schaner è il Nadal ortodox. En il passà han blers giasts da la Russia passentà quels dis a San Murezzan en Engiadin’Ota. Cun tschainas pompusas è vegnì festivà – oravant tut en ils hotels da luxus.
Ils hotels taschan
Oz fan ils hotels nobels in misteri davart lur festas ortodoxas. Sin dumonda dad RTR ha unicamain l’hotel Carlton prendì posiziun a scrit. Pervia da la guerra hajan ins registrà ina reducziun da giasts da la Russia ed er da l’Ucraina. Per il Nadal ortodox porschia l’hotel ina bella tschaina, ina festa pli gronda na saja però betg planisada, scriva il responsabel.
Regress constant dapi passa 10 onns
Er la destinaziun turistica n’è betg pronta da dar in’intervista e scriva che San Murezzan haja franà pervia da la guerra tut las activitads en Russia il mars 2022. Vinavant scriva la responsabla, che las consequenzas turisticas pervi dal conflict sajan evidentas. L’onn 2022 sajan arrivads marcantamain damain giasts da la Russia a San Murezzan. Tenor la statistica da pernottaziuns a San Murezzan dat quai ina reducziun da giasts da la Russia da 35% ils ultims 12 onns. Affaristas ed affarists da San Murezzan observan quel regress constant dapi plirs onns. Tuttina hajan els lavurà bain sur ils dis da festa passads.