L’expertisa d’in biro extern davart la planisaziun da la nova chasa da scola Grevas a San Murezzan ha laschà diversas dumondas avertas. Quellas duain vegnir scleridas en tschintg pass.
Grondezza e lieu
Sco la suprastanta Regula Degiacomi ha ditg a la seduta dal cussegl communal, duai en in emprim pass vegnir sclerì pli profund il program da spazi. Vul dir, quants locals ch’i dovra e quant grond che quels duain esser. Quai tranter auter a mauns da scleriments davart furmas d’instrucziun pussaivlas en l’avegnir. Il program da spazi è lura la basa per examinar in lieu pussaivel ed er la dumonda sche San Murezzan vul unir las duas chasas da scola dad oz ubain cuntinuar cun pliras chasas da scola en vischnanca. Cura che quellas dumondas èn scleridas possia vegnir examinà il project sco tal uschia ch’ins pudess avair ina basa per in eventual preproject. La finamira saja d'avair sin maisa quel en in onn.
Ord l'archiv
Gia il 2019 ha la vischnanca San Murezzan preschentà ils plans per la nova scola. RTR ha rapportà.