Il suveran da San Murezzan decida ils 31 da schaner davart dus projects. Dad ina vart davart in center da sport multifuncziunal e da l'autra vart davart ina rait da fibra da vaider.
Halla da sport multifuncziunala
La halla da tennis a San Murezzan Bagn ha 40 onns ed è rivada a la fin da sia durada da vita. Remplazzar ella vul la possessura, la Bäder SA, cun ina halla da sport multifuncziunala. Quella duai cuntegnair dus plazzas da tennis dadens e dus dadora. La halla duai era pudair vegnir nizzegiada sco sala d'eveniments. En pli duai vegnir integrada ina partiziun da spa e wellness.
Per pussibiltar la realisaziun d'ina tala halla sto il suveran approvar in'adattaziun dal dretg da construcziun.
Rait da fibra da vaider
San Murezzan vul en pli fabritgar ina rait da fibra da vaider. Ils custs da 10,5 milliuns francs vegnan partids si tranter la vischnanca e San Murezzan Energia che vegn lura a gestiunar la rait. Fabritgada duai ella vegnir da la Swisscom.
Sch'il suveran dat glisch verda duai la construcziun cumenzar la primavaira 2021. Enfin l'atun 2025 duain lura tut las chasadas privatas e tut ils affars da San Murezzan esser colliads cun la rait da telecommunicaziun sperta.
