San Murezzan vul augmentar pè da taglia sin immobiglias

Il cussegl communal ha dentant refusà dad augmentar il pè da taglia tar las persunas natiralas per proxim onn. Fatg quint vegn er proxim onn cun 60%. Tar la taglia dad immobiglias vegni a dar in augment da 0,25‰.

San Murezzan Bild in Lightbox öffnen.

Legenda da maletgs: La vischnanca da San Murezzan ha da spargnar. RTR, David Spinnler

Auter sco che la suprastanza aveva proponì al parlament da San Murezzan, n’ha quel betg vulì augmentar il pè da taglia tar persunas natiralas per l’onn 2017. Cun midar dentant la taxa tar la taglia dad immobiglias da 0,5‰ sin nov 0,75‰ possa la vischnanca far quint cun ulteriuras entradas da var 1,3 milliuns francs, ha declerà il president communal, Sigi Asprion als cussegliers.

Anc adina tranter ils megliers

Che la vischnanca perdess cun l’augment da taglia sin las immobiglias l’attractivitad sin il martgà, n’hajan ins betg da tmair. Tenor il president communal saja San Murezzan er cun 0,75‰ anc a la testa da las vischnancas attractivas.

Discussiun betg giu da maisa

Era sch’il parlament ha refusà in augment dal pè da taglia per l’onn 2017, na vegnia San Murezzan betg dad evitar ina discussiun davart la situaziun finanziala da la vischnanca. Sco ch’i para serra il quint annual da San Murezzan quest onn per l’emprima giada cun in deficit da var 3,5 milliuns francs. En vista a las investiziuns da passa 100 milliuns francs che la vischnanca ha da far ils proxims onns, vuli dapli entradas. Actualmain ha San Murezzan cun 60% gist davos Schlarigna cun 50%, il pè da taglia il pli bass en Engiadina.

RR novitads 06:00