La televisiun svizra SRF ha filmà en Val Müstair per l'emissiun «Verkehrte Welt». Là datti in barat da famiglias en duas vischnancas che han il medem num ma èn in differents pajais. Uschia è quai il cas cun Sta. Maria Val Müstair e Santa Maria en California.
Las famiglias han midà dachasa
Meinrad e Verena Meier èn uschia partids cun l'aviun en direcziun da la California, natiralmain inscenà davant la camera da la televisiun svizra. Paucs dis pli tard èn lura arrivads ils giasts da Santa Maria en California. Michael Angelo Zoppo e Jeannie Zoppo. Els han passentà quasi in'emna a Sta. Maria en Val Müstair.
Invista en in auter mund
Accumpagnà las duas famiglias han las cameras da la televisiun svizra. Ils Zoppos èn arrivads dad ina citad cun radund 100'000 abitants en las muntognas da la Val Müstair. La famiglia americana ha gì gust da la visita en ina pitschna val da la Svizra al cunfin cun l’Italia. Impressiun han fatg las muntognas, dentant era il fatg ch'ins salida in l'auter en Val Müstair. Quai na saja betg uschia a Santa Maria California. Ils Zoppos han er gia fatg plans da returnar in di a Sta. Maria en Val Müstair.
L'emissiun «Verkehrte Welt» da la televisiun svizra SRF vegn mussada als 19 da favrer 2016 a las 21:00 h sin SRF1.
