Siglir tar il cuntegn

Header

video
Fibra da vaider PEM per la Val Müstair
Or da RTR dals 07.10.2016.
laschar ir. Durada: 2 minutas 33 Secundas.
cuntegn

Engiadina Sbassar custs en Val Müstair tras fibra da vaider

Cun ina lingia da fibra da vaider vuless il Provedimaint electric PEM da la Val Müstair tatgar tut las gestiuns communalas ed uschia sbassar marcantamain ils custs.

Fin ussa passava anc ina suletta lingia d'electricitad da tensiun media tras tut la Val Müstair. Cun ina nova lingia vuless il PEM realisar fin il 2017 in conduct circular. Quel segirescha che la forza electrica na vegnia betg interrutta e circulescha en avegnir en furma d'anè.

Per colliar e gestiunar il nov conduct circular han ins fabritgà tschintg novas staziuns da transfurmaturs. Quests transfurmaturs vegnian survegliads d'in singul computer e quai tras ina lingia da fibra da vaider.

audio
Mezdi: Fibra da vaider per sbassar ils custs en Val Müstair (senza Mia Engiadina)
ord Actualitad dals 07.10.2016.
laschar ir. Durada: 2 minutas 42 Secundas.

Nizzegiar la fibra da vaider anc per datas communalas

La capacitad da questa fibra da vaider è gronda. Ed uschia vul il PEM anc quest onn colliar en in emprim pass tut las gestiuns communalas. Cun la finamira da centralisar las datas cun in server central, spargnassan ins tenor Clà Filip Pitsch, manader dal PEM, ina massa da raps.

Anc auters astgan profitar da la rait

En ina segunda etappa vuless il PEM era colliar l’Ospital Val Müstair, las scolas communalas e la Biosfera Val Müstair. Tut tenor interess stess questa tecnica a disposiziun anc era per firmas pli grondas. La colliaziun en chasadas privatas è dentant pel mument betg prevesida. Quai ord motivs finanzials, uschia Pitsch.

RR actualitad 12:00

Artitgels legids il pli savens