La documentaziun «Suot tschêl blau» dal cineast jauer Ivo Zen, procura per discussiuns. Il film che raquinta dal drama da giuvenils ch’èn morts ils onns 1980 fin 1990 vi da drogas diras en vischnanca, avra novas dumondas.
Nus avain badà che tant ils uffants sco er ils geniturs na schevan betg adina la vardad. Ils scolars n’eran per exempel betg a chasa la saira.
Tar il medi da chasa, Gian Bieler, vegnivan adina puspè giuvenils che consumavan drogas. Saja quai ord atgna voluntad, ma er causa ch’ils geniturs avevan reagì.
Per part eran quai cas urgents, nua ch’ins aveva bunamain da reanimar causa ina surdosa.
Savens sajan ils geniturs e las autoritads vegnids a lur cunfins, sa regorda il reverenda da quella giada, Ulrich Walther. Entant ch’ils ins eran buns da discurrer davart la dependenza da lur uffants, saja tar auters tut la scena da drogas stada tabu.
Jau hai gì da preparar pleds funebers per persunas ch’eran be paucs onns pli giuvnas che jau mez.
Culpabel per la mort da plirs giuvenils tras drogas, na vegnian ins e na vulan ins era betg tschertgar. Dentant tutga il drama tar l’istorgia da la vischnanca da Samedan e da la regiun.
