Siglir tar il cuntegn

Engiadina Schanza e clinica Gut muventan la populaziun da San Murezzan

Il Cussegl communal da San Murezzan di gea a la planisaziun locala per ina nova clinica Gut.

Legende: Video Interess enorm per tractativas dal cussegl communal da San Murezzan abspielen. Laufzeit 0:20 Minuten.
Or da RTR dals 27.08.2015.

Il Cussegl communal da San Murezzan ha deliberà la missiva per mauns da la votaziun dal pievel davart la planisaziun locala Serletta sid. Questa planisaziun duai pussibilitar la construcziun dad in nov hotel da sanadad ed ina nova chasa per la clinica Gut.

Las discussiuns èn stadas lungas ed animadas. Quai pervia ch'ils hotels da luxus Palace e Kulm èn cunter il project. Ils hotels argumentschan ch'ils bajetgs planisads destruissan la vista ord ils hotels da luxus. Pervia da quest conflict è la discussiun stada da grond interess. Radund 150 persunas han persequità las tractativas dal cussegl communal.

Sbagls tar la schanza per sigl cun skis

In segund tema fitg emoziunal a San Murezzan è la nova schanza da sigl cun skis. Il project deliberà da la populaziun avess gì da custar 11,5 miliuns francs. Ussa duai la schanza nova però custair passa 20 miliuns francs. Quai surtut pervia da sbagls da planisaziun, ha infurmà il cussegl communal. Ussa duai dar in nov project, uschia che populaziun vegn a stuair decider in'ulteriura giada.