Siglir tar il cuntegn

Header

cuntegn

Schlarigna Approvà preventiv che quinta cun in minus da passa 1,2 milliuns

Unanimamain ha la radunanza communala da Schlarigna approvà il preventiv 2024. Quel quinta cun in surpli d'expensas da passa 1,2 milliuns francs tar expensas totalas da 24,6 milliuns. Plinavant èn per l'auter onn previs investiziuns nettas da passa 4,5 milliuns francs. Ultra da quai resta il pe da taglia tar 50% da la taglia chantunala simpla.

Approvà la lescha davart la promoziun dal spazi d’abitar per la populaziun indigena

La taglia sin immobiglias vegn auzada sin 1,0‰ (0,25‰ a favur da la finanziaziun speziala «promoziun dal spazi d'abitar»). A chaschun da la radunanza communala è vegnida approvada la nova «lescha davart la promoziun dal spazi d’abitar per la populaziun indigena». Suenter scleriments planisatorics ha stuì vegnir constatà che mesiras restrictivas en il sectur da l’effectiv d’abitaziuns da dretg vegl na fissan betg cunvegnentas e fissan pli difficilas da far valair en la pratica.

Cun la lescha numnada è la suprastanza communala dumandada da prender mesiras per promover spazi d’abitar adattà als basegns da la populaziun indigena. En quellas èn cuntegnids differents instruments che pon vegnir impundids per cuntanscher questa finamira.

Approvà cunvegna da prestaziun

Vitiers han votantas e votants da Schlarigna approvà la cunvegna da prestaziun per ils onns 2024 fin 2027 tranter las vischnancas da l'Engiadin'Ota ed ils dus centers da sanadad Promulins e Du Lac. La nova cunvegna da prestaziun da quatter onns sto vegnir approvada formalmain da tut las vischnancas da l’Engiadin’Ota. Questa approvaziun vegn fatga en las 11 vischnancas tenor dretg communal.

Concedì credit per sanaziun da las funtaunas d'aua

La radunanza ha er concedì in credit da 3 milliuns francs per sanar las funtaunas d'aua en ils territoris da Laret, Arivagnas e Selin-Manella. Questas funtaunas d’aua emplainan ils dus reservuars Blais, Postsöls e per part er il reservuar Schlattain. Las funtaunas garanteschan ina gronda part da la quantitad d’aua da baiver per la vischnanca. Questas funtaunas sajan per la gronda part en in nausch stadi e dovria perquai ina sanaziun, ha scrit la vischnanca.

RTR novitads 15:00

Artitgels legids il pli savens