Suenter che Christian Brantschen ha demissiunà sco president communal da Schlarigna per la fin da l’onn, è s'annunzià be ina candidatura per il post vacant. Andrea Fanconi vul daventar president.
Il candidat
L’um da 44 onns è maridà e bab da dus uffants e president da la partida Il Center d’Engiadin’Ota. El è era il schef da l’uffizi da scussiun e concurs da la regiun Malögia. Andrea Fanconi ha però disditg questa plazza, per daventar president communal da Schlarigna.
Igl è in ristg da laschar mia lavur sco schef d’uffizi. Jau stoss ir enturn cun questa decisiun, però sun jau gia s'exponì a ristgs ed igl ha funcziunà. Jau hai la fiduzia ch'i va era bain questa giada.
Senza in cumbat electoral e sco unic candidat, na saja la tensiun betg uschè gronda. Per la vischnanca da Schlarigna pero, saja quai pauc bun sch'i dat be in candidat per in uffizi uschè impurtant.
Qua ans vegn a stuair pensar vi da midaments dal termin da la votaziun, per attrair dapli candidatas e candidats per ils posts politics.
Specificamain a Schlarigna n’è quai betg bun, sch'i vegn tschernì ils 4 da november. Per tscherta glieud na va quai betg da candidar. Il ristg è fitg grond.
Uschia dessan ins pensar da far questas tschernas gia en la stad. Ina elecziun uschè tard en l'onn saja problematica perquai che persunas ch'han interess vi d'in post ston dar giu la plazza senza savair sch'el u ella vegn elegì.
L’ureglia averta per mintgina e mintgin
Sch'el avess da vegnir tschernì, vuless Andrea Fanconi avair dapli discussiuns cun ils votants e votantas dal vitg. Quai saja il pli impurtant.
Da collavurar, tadlar las vuschs, da mussar pertge ch’ins è per u cunter inqual chaussa. Ed er acceptar che betg tuts en da la medema opiniun. Quai è tut part da nossa democrazia.
Era auters posts duain vegnir emplenids
Sper il presidi duain era vegnir emplenids quatter posts en la suprastanza. Sco la vischnanca da Schlarigna communitgescha, han inoltrà ulteriurs trais commembers lur demissiun, la quarta persuna ha da bandunar la suprastanza causa limitaziun dal temp d’uffizi.
- Seraina Poltera (limitaziun dal temp d'uffizi)
- Andrea Fanconi
- Fadri Denoth
- Brigitte Büeler
Be duas da set persunas restan damai en suprastanza communala per ina proxima legislatura – numnadamain Monica Günthard e Lino Andreazzi. Dentant ha la vischnanca communitgà, ch'i dat be trais candidaturas per ils quatter sezs vacants:
- Philippe Baud
- Felix Hunger
- Maria Cristina Fasol Cerutti
Il suveran da Schlarigna decida ils 4 da november per la testa da la vischnanca.