Siglir tar il cuntegn

Header

audio
Corona ed uniuns: Exempel gruppa da teater Schlarigna
Or da Actualitad dals 29.11.2021.
laschar ir. Durada: 2 minutas 55 Secundas.
cuntegn

Schlarigna Gruppa da teater è puspè activa

Pervia da la pandemia da corona han las teatristas ed ils teatrists da Schlarigna stuì desister in onn cumplettamain sin provas e represchentaziuns. La stad 2021 ha la gruppa puspè cumenzà ad exercitar dus giadas l’emna. Sco Sabina Cloesters, la presidenta da la gruppa da teater Schlarigna di, haja il cumenzament duvrà energia da puspè motivar las radund 15 commembras e commembers. Numnadamain haja mintgina e mintgin sa disà vid il mintgadi senza program la saira ed uschia saja ida a perder tar l’ina u l’auter in pau il plaschair. La fin finala haja la gruppa da teater da Schlarigna però veglia da star sin il palc e perquai hajan ins chattà svelt enavos en il ritmus d’avant la pausa sfurzada.

Versiun modifitgada

Sabina Cloesters scriva sezza ils tocs da teater. Er ella haja pers durant la pandemia il plaschair da scriver e perquai ha la gruppa da teater decis da preschentar quest onn ina versiun pli pitschna d’in teater – in uschenumnà crimi dinner. Quel è vegnì giugà cun success durant duas sairadas en in’ustaria a Schlarigna.

Atgnamain hai jau gì in grond toc in petto. La veglia da curreger ed adattar ils detagls ha però mancà e perquai ans avain decis da far in crimi dinner.
Autur: Sabina Cloesters presidenta gruppa da teater Schlarigna

En vista a la situaziun malsegira saja uss impurtant da tegnair ensemen la gruppa da teater uschia che la motivaziun ed il plaschair da giugar restia er en avegnir grond.

RTR actualitad 11:00

Artitgels legids il pli savens