Siglir tar il cuntegn
Inhalt

Engiadina Schlarigna n'ha betg avantagià la scola da skis indigena

La Dretgira administrativa dal Grischun ha refusà tut las renfatschas dal possessur da la Scuola di sci speciale, Pietro Tagliabue.

In mattin cun tschaplina blaua, giacca brina e chautschas nairas durant ina cursa da skis passa speravia ad ina porta cotschna.
Legenda: La vischnanca da Schlarigna gudogna davant la Dretgira administrativa cunter Pietro Tagliabue. Keystone

Pietro Tagliabue che posseda la scola da skis privata Scuola da sci speciale aveva renfatschà a la vischnanca da Schlarigna tranter auter da privilegiar la scola da skis San Murezzan-Schlarigna. Quai cun reparter ad ella in lieu da rimnada memia gronda. En pli ha el renfatschà che mo la scola da skis indigena possia far cursas da skis sin il prà da skis Provulèr.

Dretgira refusa tut las renfatschas

La Dretgira administrativa dal Grischun refusa en sia sentenzia da 139 paginas tut las renfatschas. Che la scola da skis indigena survegnia dapli plaz, haja da far cun sia grondezza e las cursas da skis hajan lieu surtut sin territori privat. Ina snegaziun da dretg na possian ins cun quai betg renfatschar a Schlarigna, scriva la dretgira.

Pietro Tagliabue sto purtar ils custs da la procedura e pajar ina indemnisaziun a la vischnanca da Schlarigna. El ha la pussaivladad da trair enavant la sentenzia.

RR novitads 17.00