Il punct da critica principal è stà il lieu planisà da l'hotel a l'ur da la vischnanca dasper la pista ed en vischinanza da la pendiculara Marguns. En pli n'han ils blers votants betg vulì midar ina zona d'agricultura en ina zona d'hotels entant ch'i dettia anc lieus en vischnanca che vegnissan en dumonda per la fabrica d'hotels.
Ed era la situaziun da traffic ha sveglià dubis. Il traffic fiss numnadamain ì sur ina via da quartier stretga.
Il president communal Christian Brantschen sa mussa dischillus suenter la radunanza, el di però era che talas decisiuns stoppia il suveran trair e quai haja el fatg.
Refusà terz project d'hotel
Cun questa decisiun ha il suveran da Schlarigna refusà per la terza giada durant ils davos stgars diesch onns in project per in nov hotel. Dal 2008 han ils Schlarignots refusà il project spectacular da l'architect Mario Botta en furma d'in cristal e dal 2013 in project per in hotel amez vischnanca da la Suvretta House SA.
Christian Brantschen na crai dentant betg ch'ils Schlarignots sajan s'exprimids en glindesdi saira cunter l'hotellaria da Schlarigna, mabain cunter il project sco tal.
La vischnanca lavura entant vi dad ulteriurs projects d'hotels. L'october vul la suprastanza preschentar sia planisaziun da zonas per l'entira vischnanca. Quella duai cuntegnair er zonas d'hotels.
RR novitads 23:00