Il suveran da Schlarigna ha approvà cun gronda maioritad ina revisiun da la constituziun communala. Tras quella duain las structuras organisatoricas da la vischnanca da Schlarigna vegnir cumplettadas cun lavurs strategicas ed ina clera definiziun davart las cumpetenzas, uschia l’argumentaziun en la missiva da la radunanza communala.
Direcziun da trais
Tenor la nova formulaziun da la constituziun communala surprenda il president ina rolla dubla. El presidiescha dad ina vart il cussegl communal e nov er la direcziun. Quella consista dal president en uffizi ed almain duas persunas en funcziuns directivas.
Sustegn per cussegl communal
Cun questa mesira vul ins dar distgargia als commembers da la suprastanza communala, per che quels possian s’occupar surtut cun decisiuns strategicas e politicas ha declerà il president communal Christian Brantschen. Il gremi il pli aut resta dentant vinavant la suprastanza communala.
Plinavant ha la radunanza communala da Schlarigna approvà unanimamain il preventiv per l’onn proxim. Quel prevesa in surpli d’entradas da passa 200'000 francs tar investiziuns nettas da 1,5 milliuns francs.
RR novitads 09:00