La schliaziun dal consorzi era previsa per la fin da l’onn da scola 2017/2018. Ussa è sa midada la situaziun.
Il consorzi da scola A fin Z avess il proxim onn da scola memia blers scolars ed stuess perquai manar ina classa dapli. Entras quai vegn ussa il contract schlià gia quest onn.
Ils scolars da la scola primara da Susch e Zernez che gievan a scola ad Ardez van a partir da l’avust a Zernez a scola. Guarda e Ardez restan ad Ardez. Tar il stgalim aut restan quels scolars che han cumenzà la scola a Zernez vinavant a Zernez e quels che cumenzan da nov il stgalim aut vegnan a Scuol.
Er la regiun tschertga soluziun per la scola.
La Regiun Engiadina Bassa Val Müstair vul far in’analisa per optimar las scolas da tut la regiun, betg mo per l’Engiadina Bassa, mabain er per Samignun e la Val Müstair.
Il motiv per questa analisa e la situaziun en las scolas da la regiun en avegnir. Actualmain han quellas anc tuttas la grondezza prescritta ed er il svilup dals scolars a curta vista, cun excepziun da la Val Müstair vegn ad esser dretg stabil. Che tgi dà dentant en egl, las scolas a Sent, Valsot e Samignun han gia ussa damain scolars sco che vessan plazza. In svilup negativ che savess cuntinuar. Quai en vista a la prognosa demografica regressiva en la regiun.
Il dumber da scolars en Engiadina Bassa
| Lieu | Scolars Total | Scolars da scolina | Scolars en scola primara | Scolars en stgalim aut | Capacitad utilisada | Tendenza dumber da scolars | Investiziuns? |
| Zernez | 207 | 51 | 116 | 40 | Emplenì il maximum | = | Basegn per investiziuns exista |
| Val Müstair | 138 | 28 | 72 | 38 | Betg emplenì dal tuttafatg | - | Per part basegn per investiziuns |
| Scuol | 230 | 44 | 114 | 72 | Emplenì il maximum | + | Nagin basegn per investiziuns |
| Sent | 87 | 16 | 47 | 24 | Betg emplenì dal tuttafatg | = | Nagin basegn per investiziuns |
| Tarasp | 17 | 17 | Emplenì il maximum | = | Basegn per investiziuns exista | ||
| Valsot | 113 | 10 | 71 | 32 | Betg emplenì dal tuttafatg | = | Nagin basegn per investiziuns |
| Ftan | 39 | 11 | 28 | Emplenì il maximum | = | Nagin basegn per investiziuns | |
| Samignun | 53 | 10 | 26 | 17 | Betg emplenì dal tuttafatg | + | Nagin basegn per investiziuns |