La Regiun Engiadina Bassa Val Müstair ha laschà realisar in studi che duess sclerir ina fusiun dal stgalim aut sur tut la regiun. Ord motivs d’infrastructura, transports da scolaras e scolars sco er raschuns organisatoricas è quella idea però vegnida sbittada da la regiun.
Valsot fusiunescha las scolas
Las vischnancas han però la pussaivladad da fusiunar lur scolas. Valsot prevesa da realisar quai ils proxims onns, uschè la manadra da scola da Valsot Gianna Rauch Poo. La chasa da scola a Ramosch è veglia, ina renovaziun avess per consequenza fitg grondas investiziuns. La chasa da scola a Strada percunter è ina moderna scola cun ina bella plazza da sport.
Tenor la manadra da scola è ina gruppa da lavur vidlonder d'elavurar il project ed era las mesiras da construcziun. Ina fusiun avess plinavant era il grond avantatg da resguardar ed integrar ils pli novs models pedagogics. Finalmain sto anc la radunanza communala decider sur dal project ed era sur da la finanziaziun, quai dess esser uschè enavant ils proxims dus, trais onns.