Il curs da l’emprim «KidsCamp for Schools» duai svegliar il gust d'experimentar ed er promover la creativitad individuala. La purschida è adattada per tut las classas primaras. Ils scolars passentan in’entira emna en ina atmosfera d’emprender concentrada ordaifer la solita instrucziun.
Scienza n’è betg lungurusa e sitga
La finamira principala dal center da cultura Laudinella saja da mussar als scolars da scola primara gia baud che la scienza n’è insumma betg ina materia sitga e l’art era betg memia abstracta, ha suttastritgà l’intendanta artistica, Kamilla Schatz.
Suadas e concentraziun
Durant be 5 dis han ils scolars – sper experimentar cun bacterias – exercità in’entira choreografia da saut. Sut la batgetta dal duo Royston Maldoom e Tamara McLorg han ils scolars studegià e trenà durant uras ed uras il saut. Quel furma la represchentaziun finala dal champ a San Murezzan.
RTR Telesguard 17.40