L'idea d'unir tut ils stgalims auts da las vischnancas en la part sura da l'Engiadin'Ota ha la Regiun Malögia gia preschentà questa primavaira. Actualmain vai per 350 scolaras e scolars che vegnan educadas en tschintg chasas da scola.
Entant hajan tut las suprastanzas communalas tranter Segl e Bever dà glisch verda per cuntinuar cun il project, scriva il post da svilup regiunal da la Regiun Malögia en ina communicaziun. Sper l'evaluaziun dal lieu, favurisà vegn il mument Samedan, saja er da preparar ils status dal nov consorzi da scola ed ina proposta cura che quella avess da vegnir manada per il stgalim aut.
La finamira saja d'elavurar fin la fin da quest onn ina basa per pudair decider, e da suttametter questa dumonda a la populaziun la stad proxima.
In stgalim aut cuminaivel da Segl fin a Bever?
Che quest rapport è oriundamain vegnì preschentà il favrer durant l'ultima sesida dal cussegl communal a San Murezzan n‘è betg ina casualitad. La vischnanca planisescha numnadamain sez dapi daditg in agen cumplex da scola per il stgalim aut.
En la Regiun Malögia existan en tut tschintg chasas da scola dal stgalim aut, per bunamain 300 scolaras e scolars. Il rapport mussa ch’ina collavuraziun fiss pussibla ed er giavischada.
La decisiun da San Murezzan è clera
Il parlament da San Murezzan ha decis unanimamain da persequitar vinavant il project da la fusiun da consorzi da scola secundara 1. La dumonda dal lieu dad in center scolastic era pli contestada, ma il cussegl communal è sa decidì cun 12x Gea cunter 3x Na per prioritar a Samedan.
Questa decisiun è in ferm signal envers las vischnancas che San Murezzan è pront da trametter lur scolars e scolaras a scola dador vitg.
