La radunanza communala da Scuol ha approvà mardi il preventiv per l'onn 2024. E quai senza cuntravuschs. Il preventiv prevesa ina surpli d'expensas da 1,4 milliuns francs. Quai tar custs da bunamain 60 milliuns francs. Las investiziuns nettas importan 14,2 milliuns francs.
La raschun per questa sperdita sajan, sper las contribuziuns pli autas per l'Institut Otalpin a Ftan, surtut l'augment considerabel dals custs da sanadad. Ils tractaments en l'ospital sajan liads vi da tariffas che na possian betg pli cuvrir ils custs. Cunquai che la CSEB saja organisà fitg bain e che las structuras sajan optimadas, saja la situaziun en l'Engiadina Bassa anc modesta.
Er il directur dal CSEB Joachim Koppenberg ha tegnì il pled a la radunanza ed ha declerà la discrepanza tranter las tariffas che n'èn gia blers onns betg pli vegnidas adattadas e l’augment da las sortidas. Ch’era l’iniziativa da tgira, ch'è vegnida acceptada il 2021 dal pievel svizzer, haja gì influenza sin ils custs. Il preventiv 2024 prevesa custs da sanadad da 5,9 milliuns francs per la vischnanca da Scuol, il 2023 eran quai anc 4,3 milliuns francs. La differenza dals custs da sanadad previs è tranter quest onn e l’onn che vegn radund 1,6 milliuns francs.
Investiziuns da Guarda fin Sent
Las preschentas ed ils preschents a la radunanza han era deliberà differents credits dal preventiv d’investiziun senza cuntravuschs. Tenor constituziun ston credits d’investiziun che surpassan l’import da 200'000 francs vegnir tractads separadamain. Per exempel:
- 350'000 francs per la cuntinuaziun da la planisaziun per il project Scuol Solar;
- 450'000 francs per renovar la passarella a Guarda;
- 600'000 francs per la via chantunala per l’entrada da Sur En respectivamain per il sutpassadi La Fuorcha sin territori da Sent (dependa tgenin da quests dus projects che vegn finalmain realisà dal chantun);
- 290'000 francs per la renovaziun da la via da San Jon fin per il plazzal Lischana;
- 250'000 francs per la sanaziun da la chasa da cumin a Guarda;
- 200'000 francs per la planisaziun d’in project per la tgira d’uffants Engiadina Bassa a Scuol;
- ed en tut 500'000 francs per remplazzar duas maschinas communalas.
In provisori da scola da lain
Er il project Scoula Scuol+ è stà in tema a la radunanza da preventiv. Gia il 2023 aveva il suveran concedì in credit da 250'000 francs per realisar in provisori da scola. Enstagl da prender a fit containers ha la vischnanca realisà in provisori cun elements da lain. Il glindesdi saira han las preschentas ed ils preschents deliberà in credit supplementar da 280'000 francs per quest project ch'è gia vegnì realisà. Cun quai importa il credit net per il project da scola 530'000 francs.
Il preventiv total d’investiziuns da la vischnanca da Scuol importa 18,1 milliuns francs. Per tut las investiziuns po la vischnanca da Scuol far quint cun subvenziuns da radund 3,9 milliuns francs. Uschia importan las investiziuns nettas per l’onn che vegn 14,2 milliuns francs. Il grad d'atgna finanziaziun importa 8%.
La radunanza communala ha era decis da laschar las taxas d’aua, da chanalisaziun e serenera sco ils ultims onns. Er il pe da taglia resta sin 100% da la taglia chantunala simpla.