Siglir tar il cuntegn

Header

Dutg Brancla tar Ramosch.
Legenda: Polizia chantunala
cuntegn

Scuol Chattà um dad 80 onns suenter gronda acziun da retschertga

La dunna da l'um dad 80 onns haja infurmà la Polizia chantunala venderdi enturn las 14:00 che ses um saja sparì dapi circa duas uras, scriva la Polizia chantunala. El era ì sulet or da ses hotel per far ina spassegiada.

Silsuenter ha la Polizia chantunala cumenzà ina grond'acziun da retschertga che ha purtà success la saira tard. L'um è vegnì transportà en l'ospital, sulettamain cun ina sfradentada.

Pliras patruglias da polizia, in super puma, in chaun da polizia ed in pilot da dronas èn stads en acziun venderdi saira. La fin ha in tip da la populaziun gidà da chattar l'um dad 80 onns. El era en la regiun da la Brancla tar Ramosch, scriva la Polizia chantunala.

Agid dad in super puma da l'armada

La saira las 19:45 ha la Polizia chantunala dumandà l’aviatica militara agid. La speranza era che la camera infracotschna gidia a chattar l'um. Per salvar l'um han ins lura fatg diever dal turn da suga e l'ambulanza ha silsuenter transportà el en l'ospital, scriva l'armada.

In Super-Puma da l'armada svizra tar il cumbat cunter ils incendis en la val Mesauc.
Legenda: Maletg simbolic: In super puma da l'Armada svizra tar il cumbat cunter ils incendis en la Val Mesauc. RTR

Il superpuma saja partì a las 21:00 a Dübendorf vers Scuol. A Cuira è il manader da l'acziun vegnì chargià en, hai num en ina communicaziun da l'Armada svizra.

Talas acziuns da l'armada dettia circa trais giadas il mais. Per regla na mitschian persunas sparidas però betg sco quella giada senza pli gronds donns, ha ditg il pledader da l'armada.

audio
Per tadlar: las novitads da las 14:00
ord RTR Audio dals 12.11.2022.
laschar ir. Durada: 3 minutas 18 Secundas.

RTR novitads 12:00

Artitgels legids il pli savens

Scrollar a sanestra Scrollar a dretga