En la fracziun da Scuol datti differentas purschidas per il temp liber per giasts ed indigens. Il Bogn Engiadina, l’implant da sport a Trü, il bogn cuvert Quadras, la halla da glatsch e las plazzas da tennis e da ballape a Gurlaina. Quels implants èn però vegnids en ils onns ed hajan per part da basegn renovaziuns. La fin da l’onn 2021 ha la suprastanza communala da Scuol inizià ina gruppa da lavur per ramassar propostas per in svilup coordinà da quels implants.
Differentas variantas per ils differents areals
Sco Andrea Matossi, il president da la gruppa da project «Avegnir Infra Scuol» ha ditg, en occasiun d'ina sairada d'infurmaziun publica, datti pliras ideas per ils singuls implants. En in emprim pass sa duai concentrar sin il Bogn Engiadina e l'areal Trü. Uschia prevesan las variantas per il BES in schlargiament dal bogn cun il focus sin las auas mineralas, wellness e sauna u er in nov bogn da famiglias. Per l’areal Trü datti variantas d’ina sanaziun da l’infrastructura existenta sur in lai artifizial per nudar fin tar in nov hotel. La vischnanca da Scuol prevesa investiziuns da var 45 fin 50 milliuns francs durant ils proxims 10 onns.
Integrar populaziun
Per resguardar ils basegns da las gruppas d’interess han gì lieu gia dus forums da resonanza, nua che var 40 represchentantas e represchentants èn sa participads. Ier saira è vegnida infurmada l’emprima giada la populaziun da la vischnanca da Scuol. L'october duai avair lieu in'ulteriura sairada d'infurmaziun publica. Il credit da planisaziun per la proxima fasa duai vegnir deliberà da la radunanza communala la fin da quest onn.