Las duas destinaziuns e las pendicularas vulan far accessiblas regiuns pli autas cun bunas cundiziuns da naiv. L’engrondiment dal territori da skis da Scuol pertutga l'access a la Val Tiral, quel da Samignun il territori Ravaischer Salaas.
Scuol duai sclerir ils effects per animals protegids
Tar il project da Scuol, che vul far accessibla la Val Tiral, ha la Confederaziun grondas resalvas, sche quel saja cumpatibel cun il dretg federal. Il Cussegl federal tema effects considerabels sin il spazi da viver d’animals protegids sco la lieur alva, la giaglina alva u il capricorn.
Sin dumonda dal chantun ha il Cussegl federal perquai sistì la midada dal plan directiv. Uschia pon il chantun, la regiun, la vischnanca e las pendicularas sclerir exactamain, sche quel territori saja adattà per il diever turistic.
Pendicularas speran vinavant
Tenor Andri Lansel, il president dal cussegl d'aministraziun da las pendicularas da Motta Naluns dovri ussa blera lavur da persvasiun. La resposta na saja en quest senn betg negativa. Il plan da las pendicularas fiss d'integrar la Val Tiral en il territori da skis e persuenter desister da differentas pistas en la val.
Samignun duai far in rapport ecologic
Tar il project da Samignun n'èsi tenor il Cussegl federal betg pussaivel da giuditgar co che quel influenzeschia il spazi da viver impurtant da la selvaschina e la cuntrada. Tar il territori da Ravaischer Salaas sa tracti dad in chombra natirala al cunfin tar il territori da skis actual.
Il Cussegl federal ha perquai approvà l’adattaziun dal plan directiv be cun la cundiziun, ch'i dettia in'examinaziun – in rapport ecologic. Sin fundament da quel vegn lura il Departament federal per l’ambient a decider.
Per tadlar curt e concis: