A Scuol vegn fatg festa per il giubileum da 25 onns Bogn Engiadina Scuol. Sper musica e chant ha la populaziun er gì la pussaivladad da mirar las localitads dal bogn e tge ch'è vegnì renovà ils ultims dus mai. Er l'iniziant dal Bogn Engiadina Scuol è tranter ils visitaders, Not Carl ch'era avant 25 onns il president communal. El è loschs schizunt in zic commuventà da savair festivar il giubileum. Cunzunt perquai ch'i ha dà vuschs criticas areguard la finanziaziun dal bogn.
Sceptica tar la realisaziun dal bogn avant 25 onns
Suenter trais onns e mez fabrica e custs da passa 50 milliuns francs avra il Bogn Engiadina Scuol ils 28 da favrer 1993 sias portas. Quella giada in project da pionier e quai schizunt sur ils cunfins Svizzers or.
25 onns pli tard han passa 5.5 milliuns giasts visità il Bogn Engiadina a Scuol e transmidà la regiun d’in lieu da turissem da stagiun en in lieu da turissem da l'entir onn – ina da las grondas finamiras quella giada.
Esser pionier è adina positiv. Era a lunga vista. Cunquai avain nus mussà en la regiun quant innovativ che nus essan, quant curaschi che nus avain per prender per mauns projects u visiuns per l'avegnir.
Grondas investiziuns per restar attractiv
Dentant è era la concurrenza creschida. Praticamain mintga regiun turistica pli gronda porscha en ina ubain en l’autra furma spiertas da wellness e recreaziun. Per insumma restar attractiv ha il Bogn Engiadina Scuol ord quel motiv successivamain stuì far grondas investiziuns en sia infrastructura. Sut il stritg han ins investì dapi l’avertura radund 16 milliuns francs en il mantegniment ordinari e diversas renovaziuns ed engrondiments. Sco per exempel il 2012 il cumplex per far sauna e bogns, il 2015 la halla d’entrada ubain actualmain tut la part da las gardarobas. Era sche la gestiun ha scrit durant ils ultims onns cifras cotschnas, ils raps èn tenor il directur dal Bogn Engiadina Scuol Gerhard Hauser bain investids e quai en differentas manieras.
Il trend da medical wellness u da far insatge per la sanadad, quel crescha tenor mai. Perquai sun jau persvas che nus essan cun nossa spierta sin la dretga via ... sch’ins guarda era enturn il Bogn Engiadina tge che è vegnì fabritgà ed investì sin il stradun, alura è quai franc ina gronda influenza dal Bogn Engiadina.
Cun la renovaziun da las gardarobas concluda ina fasa da renovaziuns pli extaisa per il Bogn Engiadina Scuol cun la quala ins spera dad esser puspè cumpetitiv era per ils proxims decennis.
Ord l'archiv
RR actualitad 17:00