La finamira dal selvicultur da revier da Scuol Antonin Hugentobler è da chattar il bau-scorsa avant ch’el procura per gronds donns en il guaud. En ils davos onns è la quantitad da baus-scorsa sa multiplitgada enorm ferm, quai oravant tut causa las temperaturas e la sitgira. Pertutgà dal bau-scorsa è per gronda part il pign.
Cun il chaun a la tschertga
Antonin Hugentobler e ses chaun Zino absolvan actualmain ina scolaziun tar ina scola spezialisada. La finamira è ch'il chaun signalisescha a temp sche ina planta è pertutgada.
Da primavaira sgolan ils emprims baus-scorsa sin las plantas e communitgeschan al rest da la populaziun en furma dad ina savur nua ch’els sa chattian. E precis quella savur, quella nivla da feromon, duess il chaun savurar e signalisar al possessur sche ina planta è pertutgada.
Sche questa varianta è la soluziun da l'avegnir na possian ins il mument betg dir, ma i vala la paina dad empruvar quant grond ch'il success da la tschertga cun il chaun è.